Martin Hermannsson náði ekki að jafna afrek Jóns Arnórs Stefánssonar og vera í sigurliði í Evrópukeppni í körfuknattleik. Martin varð að sætta sig við silfurverðlaunin í Evrópubikarnum eftir að lið hans, Alba Berlín frá Þýskalandi, tapaði þriðja og síðasta úrslitaleiknum gegn Valencia á Spáni, 89:63, í gærkvöld.
Jón Arnór er þar með áfram eini Íslendingurinn sem hefur unnið Evrópumót félagsliða í íþróttinni. Það gerði hann vorið 2005 með rússneska liðinu Dinamo frá Pétursborg þegar það vann BC Kiev 85:74 í úrslitaleik Evrópudeildar FIBA.
Næsta verkefni Martins og félaga er toppslagurinn heima í Þýskalandi. Þar eru þeir í fjórða sæti sem stendur en eiga þrjá til fjóra leiki til góða á keppinautana vegna þess hve langt þeir fóru í Evrópubikarnum. Alba á enn tíu leikjum ólokið í deildinni en síðan taka við átta liða úrslitin um þýska meistaratitilinn.