Í kvöld kemur í ljós hvort það verður Keflavík eða Stjarnan sem mætir Val í úrslitaeinvíginu um Íslandsmeistaratitil kvenna í körfuknattleik en liðin mætast í oddaleik í Keflavík.
Staðan í einvíginu er 2:2 eftir að Stjarnan vann fyrstu tvo leikina en Keflavík jafnaði metin með því að vinna þriðja og fjórða leik. Stjarnan freistar þess að komast í úrslit í fyrsta skipti í sögunni, en Keflavík hefur átján sinnum komist í úrslitaeinvígið eftir að núverandi keppnisfyrirkomulag var tekið upp árið 1993. Keflavík varð síðast meistari árið 2017 og vann þá titilinn í sextánda sinn.
Keflvíkingar eru að smala á leikinn í kvöld og stefna að því að fylla húsið. Má því búast við góðri stemningu.
Leikurinn í kvöld hefst klukkan 19:15 og verður fylgst með gangi mála hér á mbl.is.