Valur og Haukar verða í Laugardalshöllinni þegar undanúrslit Geysisbikars kvenna í körfubolta fara fram, en þau unnu örugga sigra í átta liða úrslitum í kvöld.
Ríkjandi bikarmeistarar Vals unnu sannfærandi 89:59-sigur á Breiðbliki á heimavelli. Eftir jafnan fyrri hálfleik voru Valskonur miklu sterkari í seinni hálfleiknum og sérstaklega í fjórða leikhluta, en hann vann Valur 34:12.
Dagbjört Dögg Karlsdóttir og Helena Sverrisdóttir skoruðu 23 stig hvor fyrir Val, eins og Danni Williams fyrir Breiðablik.
Haukar áttu ekki í neinum vandræðum með að vinna Grindavík á heimavelli, 81:54. Staðan í hálfleik var 50:22 og voru Grindvíkingar ekki líklegir til að jafna í seinni hálfleik.
Þóra Kristín Jónsdóttir skoraði 24 stig fyrir Hauka og Lovísa Björt Henningsdóttir gerði 17 stig. Bríet Sif Hinriksdóttir skoraði 13 fyrir Grindavík.