Nýliðinn efnilegi Zion Williamson er þegar búinn að setja met í NBA-deildinni í körfuknattleik eftir að hafa spilað aðeins tólf leiki með New Orleans Pelicans.
Williamson, sem missti af fyrstu 43 leikjum tímabilsins vegna meiðsla, skoraði 32 stig gegn Oklahoma City Thunder í nótt og varð með því yngsti leikmaðurinn í sögu deildarinnar til að skora tuttugu stig eða meira í sex leikjum í röð. Hann er aðeins nítján ára gamall og verður tvítugur í júlí. Framlag hans nægði þó ekki því New Orleans mátti sætta sig við tap á heimavelli, 118:123.
Boston Celtics lagði Los Angeles Clippers að velli í stórleik í Boston, 141:133, þar sem staðan var 114:114 eftir venjulegan leiktíma. Leikurinn var tvíframlengdur. Jayson Tatum skoraði 39 stig fyrir Boston og tók 9 fráköst og Lou Williams skoraði 35 stig fyrir Clippers. Boston er með 38 sigra í 54 leikjum í þriðja sæti Austurdeildar en Clippers er í þriðja sæti Vesturdeildar með 37 sigra í 55 leikjum.
Þetta voru tveir síðustu leikirnir fyrir stjörnuleikshelgi NBA en hún er haldin í Chicago að þessu sinni og sjálfur leikurinn þar sem lið LeBron James og Giannis Antetokounmpo eigast við hefst kl. eitt að íslenskum tíma aðfaranótt mánudags.