Höttur náði í kvöld tveggja stiga forskoti á toppi 1. deildar karla í körfubolta með 89:71-útisigri á Snæfelli. Á sama tíma tapaði Hamar á móti Vestra á útivelli, 79:90, en Höttur og Hamar voru jöfn að stigum á toppnum fyrir leikinn.
Staðan hjá Hetti og Snæfelli var jöfn í hálfleik, 39:39, en gestirnir frá Egilstöðum voru miklu sterkari í seinni hálfleik og unnu að lokum öruggan sigur. Dino Stipcic skoraði 27 stig fyrir Hött og Brandon Cataldo skoraði 20 fyrir Snæfell.
Hamar var með 44:39-forskot í hálfleik gegn Vestra, en heimamenn voru sterkari í seinni hálfleik og tryggðu sér óvæntan sigur.
Nebojsa Knezevic skoraði 26 stig fyrir Vestra og gaf tíu stoðsendingar. Everage Richardsson skoraði 20 fyrir Hamar og tók 10 fráköst.