Jón Axel Guðmundsson, landsliðsmaður í körfubolta, var í dag verðlaunaður sem íþróttamaður ársins hjá Davidson-háskólanum í Bandaríkjunum.
Skólinn teflir fram liðum og einstaklingum í hinum ýmsu greinum undir nafninu Davidson Wildcats, en Jón Axel þótti skara fram úr í skólanum í karlaflokki.
Jón er einn merkasti íþróttamaðurinn í sögu körfuboltaliðs skólans en hann var m.a. valinn leikmaður ársins í Atlantic 10 riðlinum á síðasta ári. Þá er hann eini leikmaðurinn í sögu skólans sem hefur skorað 1.000 stig, tekið 500 fráköst og gefið 500 stoðsendingar. Þá er hann í hópi tíu stigahæstu leikmanna í sögu skólans.
Jón greindi frá því í samtali við Morgunblaðið á dögunum að hann freisti þess að komast að liði í NBA-deildinni vestanhafs. Hefur hann rætt við Charlotte Hornets, Cleveland Cavaliers, Utah Jazz, Phoenix Suns og Milwaukee Bucks og mun sömuleiðis ræða við Miami Heat, Sacramento Kings og Golden State Warriors á næstunni.
The 2019-20 Male Athlete of the Year will go down as one of the most decorated players in school history. This year's winner is... #aCATemyAwards pic.twitter.com/iPTjgm3RAY
— Davidson Athletics (@DavidsonWildcat) May 29, 2020