Martin Hermannsson átti stórleik fyrir Alba Berlín þegar liðið fékk Göttingen í heimsókn í seinni leik liðanna í átta liða úrslitunum um þýska meistaratitilinn í körfuknattleik í kvöld. Leiknum lauk með þriggja stiga sigri Alba Berlín, 88:85, en Martin var stigahæstur í liði Alba Berlín með 19 stig og þá gaf landsliðsmaðurinn sjö stoðsendingar í leiknum.
Alba vann fyrri leikinn með 25 stiga mun og var því með þægilegt forskot fyrir leikinn í kvöld. Alba leiddi með sex stigum eftir fyrsta leikhluta, 22:16, en í hálfleik var staðan 52:31, Alba Berlín í vil, og þann mun tókst Göttingen ekki að vinna upp.
Martin var fjarri góðu gamni í fyrri leik liðanna vegna meiðsla en hann snéri aftur í dag með látum. Alba Berlín er komið áfram í undanúrslit þar sem liðið mætir Oldenburg.