Stórstjörnurnar LeBron James og Anthony Davis voru við sama heygarðshornið þegar NBA-deildin fór aftur í gang í nótt og LA Lakers tókst að leggja öflugt lið nágrannanna í LA Clippers 103:101.
Davis skoraði 34 stig og var stigahæstur en James skoraði 16 stig, tók 11 fráköst, gaf 8 stoðsendingar og varði skot.
Stjörnurnar hjá Clippers skiluðu einnig sínu þótt það dygði ekki til sigurs. Paul George skoraði 30 stig og Kawhi Leonard skoraði 28 stig.
Tveir leikir voru á dagskrá í Orlando þar sem NBA-deildin mun ljúka keppnistímabilinu 2019-2020. Utah Jazz vann New Orleans Pelicans 106:104.
Jordan Clarkson skoraði 23 stig fyrir Utah og Brandon Ingram gerði einnig 23 stig fyrir New Orleans. Zion Williamson, sem valinn var fyrstur í nýliðavalinu, skoraði 13 stig.