Keflvíkingar fá liðsauka

Hjalti Þór Vilhjálmsson þjálfari Keflvíkinga er ánægður með nýjasta liðsmann …
Hjalti Þór Vilhjálmsson þjálfari Keflvíkinga er ánægður með nýjasta liðsmann þeirra. mbl.is/Eggert Jóhannesson

Keflvíkingar hafa samið við bandaríska körfuknattleiksmanninn CJ Burks um að leika með liði þeirra á komandi keppnistímabili en þetta kemur fram á samfélagsmiðlum félagsins.

Sagt er að Burks sé væntanlegur til landsins í byrjun næstu viku og ætti að vera klár í fyrsta leik en Keflvíkingar sækja Þórsara heim í fyrstu umferð úrvalsdeildar karla fimmtudaginn 1. október.

Hjalti Þór Vilhjálmsson þjálfari Keflvíkinga segir um Bandaríkjamanninn að hann sé fjölhæfur vængmaður en einnig góður varnarmaður. Hann hafi útskrifast úr Marshall-háskólanum vorið 2019 og verið þar í hópi lykilmanna öll fjögur árin. „Hann er mikill keppnismaður og ég hlakka mikið til að fá hann í okkar raðir,“ segir Hjalti.

Burks, sem er 24 ára gamall, fór í nýliðaval NBA 2019 en komst ekki að þar og í kjölfarið samdi hann um að leika með ítalska B-deildarliðinu Orzinuovi haustið 2019. Hann var hinsvegar leystur undan samningi eftir mánuð vegna meiðsla en þá blasti við að hann yrði tvo til þrjá mánuði frá keppni.

mbl.is
Fleira áhugavert
Fleira áhugavert