Valencia vann sinn fyrsta sigur á tímabilinu í spænsku A-deildinni í körfubolta í dag er liðið lagði Andorra á heimavelli, 91:76. Martin Hermannsson var stigahæstur hjá Valencia með 14 stig.
Valencia, sem mátti þola tap fyrir Baskonia í fyrstu umferð, var yfir nánast allan leikinn og var sigurinn sannfærandi.
Eins og áður segir var Martin Hermannsson stigahæstur með 14 stig hjá Valencia á 20 mínútum. Þá gaf hann fjórar stoðsendingar og tók eitt frákast.
Haukur Helgi Pálsson lék í tæpar 13 mínútur með Andorra og skoraði sex stig, tók eitt frákast og gaf eina stoðsendingu. Andorra hafði betur gegn Murcia í fyrstu umferð og eru bæði lið með einn sigur og eitt tap.