Deildarmeisturum Vals var úrskurðaður 20:0-sigur gegn Breiðabliki í Dominos-deild kvenna í körfubolta þrátt fyrir að Breiðablik hafi unnið leikinn 71:67 síðasta miðvikudag. Fanney Lind Thomas lék með Breiðabliki í leiknum en hún átti vera í leikbanni og taldist því ólögleg.
Blikar eru allt annað en sáttir með niðurstöðuna og Ívar Ásgrímsson þjálfari Breiðabliks sagði við Vísi í dag að Breiðablik ætli að kæra niðurstöðuna. „Við teljum að þessi niðurstaða standist ekki reglur,“ sagði Ívar við Vísi.
Miðvikudaginn 11. mars var Fanney úrskurðuð í eins leiks bann vegna tveggja tæknivillna og mótmæla. Var tímabilinu frestað tveimur dögum síðar og stuttu síðar aflýst vegna kórónuveirunnar. Fyrsti leikurinn eftir að hún var úrskurðuð í bannið var því gegn Val í 1. umferð deildarinnar í vetur.
Breiðablik var einnig sektað um 250.000 krónur vegna atviksins.