Martin Hermannsson var langt frá sínu besta er spænsku liðin Valencia og Barcelona áttust við í Evrópudeildinni í körfubolta, sterkustu keppni álfunnar, í kvöld. Hafði Barcelona að lokum betur á útivelli, 71:66.
Martin skoraði aðeins eitt stig, gaf tvær stoðsendingar og tók eitt frákast á rúmum 14 mínútum. Var um fyrsta tap Valencia að ræða í keppninni á tímabilinu og er liðið með tvo sigra og eitt tap, eins og Barcelona.
Haukur Helgi Pálsson og samherjar hans í Andorra máttu þola 66:82-tap fyrir Bologna á heimavelli í Evrópubikarnum.
Haukur skoraði 6 stig fyrir Andorra, tók tvö fráköst og stal einum bolta. Nýtti hann ekki eitt einasta þriggja stiga skot í fimm tilraunum. Andorra er með einn sigur og tvö töp í fyrstu þremur leikjunum.