Tryggvi Snær Hlinason og samherjar hans í Zaragoza unnu kærkominn 98:86-heimasigur á Murcia í efstu deild Spánar í körfubolta í dag. Landsliðsmaðurinn stóri og stæðilegi átti ein bestu tilþrif leiksins er hann skoraði með glæsilegri troðslu, beint eftir innkast.
Lék Tryggvi í rúmar 25 mínútur og skoraði tíu stig og tók níu fráköst. Brenndi hann ekki af einu einasta skoti í leiknum. Aðeins Dylan Ennis lék meira en Tryggvi hjá Zaragoza eða tæplega 31 mínútu.
Sigurinn var sá fyrsti hjá Tryggva og félögum eftir fjóra tapleiki í röð. Er liðið í fjórtánda sæti deildarinnar með fjögur stig.
Troðsluna mögnuðu má sjá hér fyrir neðan.