Leikur sem við eigum að vinna
Baldur Þór Ragnarsson, aðstoðarþjálfari íslenska karlalandsliðsins í körfuknattleik, er bjartsýnn fyrir leik liðsins gegn Kosovó í forkeppni HM 2023 á morgun en leikurinn fer fram í Bratislava í Slóvakíu.
Ísland vann sterkan fjórtán stiga sigur gegn Lúxemborg í gær, 90:76, en Baldur á von á allt öðruvísi leik á morgun.
Aðstoðarþjálfarinn ræddi málið við Valtý Björn Valtýsson á Sport FM í dag.
„Kosovó er aðeins öðruvísi lið en Lúxemborg,“ sagði Baldur Þór.
„Þeir eru ekki að spila jafn mikið með fimm fyrir utan og Lúxemborg og þeir eru með sterkari leikmenn í stöðum þrjú og fjögur.
Haukur Helgi og Pavel eru vanir að spila þessa stöðu með landsliðinu og við erum án þeirra í þessu verkefni.
Við þurfum því að finna leiðir til þess að stoppa þessar stöður þar sem við erum lægri í loftinu. Þeir geta sótt á okkur þarna en að sama skapi erum við með mörg vopn í vopnabúrinu líka.
Ef að við gerum okkar vel þá eigum við að vinna þennan leik,“ bætti Baldur við.