Milwaukee Bucks jafnaði í nótt einvígi sitt við Brooklyn Nets í undanúrslitum Austurdeildar NBA í körfuknattleik í 3:3 og tryggði sér þar með oddaleik.
Khris Middleton og Giannis Antetokounmpo fóru báðir á kostum í liði Milwaukee og voru með tvöfalda tvennu á meðan James Hardens og Kyrie Irvings var sárt saknað í herbúðum Brooklyn.
Middleton skoraði 38 stig og tók 10 fráköst að auki og Giannis var með 30 stig og tók 17 fráköst.
Mikið mæddi á Kevin Durant í liði Brooklyn og náði hann sömuleiðis tvöfaldri tvennu er hann skoraði 32 stig og tók 11 fráköst en það dugði ekki til í nótt.
Milwaukee vann að lokum nokkuð þægilegan 104:89 sigur og mætast liðin því í sjöunda leik, oddaleik, aðfaranótt sunnudags til þess að skera úr um sigurvegara einvígisins.