Ævintýraleg sigurkarfa hjá Phoenix

Ævintýraleg sigurkarfa Deandre Ayton kom Phoenix Suns 2:0 yfir gegn Los Angeles Clippers í undanúrslitum NBA-deildarinnar í körfuknattleik í nótt. 

Phoenix fékk innkast við endalínuna á vallarhelmingi Clippers þegar rétt tæp sekúnda var eftir af leiknum eða 0,9 sekúndur. Var staðan þá 103:102 fyrir Clippers. Boltanum var kastað í átt að hringnum og þar kom Ayton svífandi og tróð. Afskaplega snyrtilega gert en leikklukkan fer ekki í gang fyrr en leikmaðurinn snertir boltann og með þessum tilþrifum féll Ayton ekki á tíma. Phoenix sigraði því 104:103. 

Deandre Ayton tekur á móti sendingunni en eins og sjá má mátti litlu muna að Ivica Zubac næði til boltans. AFP

Liðið er því í góðri stöðu en vinna þarf fjóra leiki til að komast í úrslitin en rimma Milwaukee Bucks og Atlanta Hawks hefst í nótt í Milwaukee.

Cameron Payne var stigahæstur hjá Phoenix með 29 stig en liðið hefur farið á kostum í úrslitakeppnina. Paul George skoraði 26 stig fyrir Clippers sem er án Kawhi Leanoard.  

Deandre Ayton fagnar sigurkörfunni ásamt Torrey Craig og Mikal Bridges. AFP

• Blogga um frétt