Íslenska karlalandsliðið í körfubolta skipað leikmönnum 20 ára og yngri vann sterkan 85:71-sigur á Eistlandi á Norðurlandamótinu í Tallinn í dag. Ísland er því með einn sigur og eitt tap í tveimur fyrstu leikjunum eftir tap gegn Finnlandi í gær.
Íslenska liðið náði forystunni snemma leiks og var staðan í hálfleik 41:27. Sigurinn var aldrei í hættu í seinni hálfleik og íslenska liðið lék vel.
Styrmir Snær Þrastarson, sem sló í gegn með Íslandsmeisturum Þórs frá Þorlákshöfn í vetur, var stigahæstur í íslenska liðinu með 25 stig. Hann tók einnig 15 fráköst. Dúi Þór Jónsson skoraði 12 stig, tók 3 fráköst og gaf 5 stoðsendingar og Veigar Páll Alexandersson skoraði 10 stig.