Forsvarsmenn NBA-deildarinnar í körfuknattleik hafa hafnað beiðni Andrews Wiggins, leikmanns Golden State Warriors, um að fá undanþágu fyrir bólusetningu vegna kórónuveirunnar á grundvelli trúarlegra ástæðna.
Þetta þýðir að Wiggins má ekki spila heimaleiki Golden State þar sem reglur í San Francisco kveða á um að allir sem eru 12 ára og eldri sem sækja stóra viðburði innandyra þurfi að hafa fengið bólusetningu vegna veirunnar.
Í tilkynningu frá NBA sagði að því gæti Wiggins ekki tekið þátt í heimaleikjum Golden State „þar til hann uppfyllir kröfur borgarinnar um bólusetningar“.
Wiggins bað um undanþágu á grundvelli trúar sinnar en þeirri beiðni var hafnað.
Fyrr á árinu hafði Wiggins látið hafa eftir sér að hann sæi ekki fram á að láta bólusetja sig þótt hann virti vilja annarra til þess.