Njarðvíkingurinn Elvar Már Friðriksson var maður leiksins er hann og liðsfélagar hans í Antwerp Giants unnu 83:65-sigur á Spirou Charleroi í belgísku úrvalsdeildinni í körfubolta í dag.
Elvar, sem kom til Antwerp frá Siauliai í Litháen fyrir þetta tímabil, var stigahæstur í sínu liði með 13 stig og þá tók hann einnig flest fráköst eða sjö. Leikstjórnandinn bætti við tveimur stoðsendingum en hann lék mest allra í sínu liði, rúma 31 mínútu.
Antwerp hefur farið vel af stað á leiktíðinni en liðið vann 81:72-sigur á Limburg í fyrstu umferð.