Landsliðsmaðurinn Haukur Helgi Pálsson er klár í slaginn á nýjan leik og verður í leikmannahóp Njarðvíkur þegar liðið tekur á móti Vestra í úrvalsdeild karla í körfuknattleik, Subway-deildinni, á föstudaginn kemur í Ljónagryfjunni í Njarðvík.
Þetta tilkynnti félagið á heimasíðu sinni en Haukur Helgi snéri heim úr atvinnumennsku í sumar og samdi við Njarðvíkinga.
Hann hefur verið að glíma við ökklameiðsli undanfarna mánuði og því ekkert leikið með liðinu það sem af er tímabili.
„Ég er tilbúinn í nokkrar mínútur núna gegn Vestra en stefni að því að vera orðinn nokkuð sprækur í næsta bikarleik,“ sagði Haukur í samtali við heimasíðu Njarðvíkur.
„Maður er að reyna að vera skynsamur og fara ekki of geyst í hlutina. Það á allt að vera gróið en nú vantar bara upp á snerpu, sprengikraft og leikform,“ bætti Haukur við.
Njarðvík er í sjötta sæti úrvalsdeildarinnar með 8 stig eftir fyrstu sjö leiki sína, fjórum stigum minna en topplið Þórs frá Þorlákshöfn og Keflavíkur.