Þórir Guðmundur Þorbjarnarson landsliðsmaður í körfuknattleik sem gekk til liðs við Landstede Hammers í Hollandi í vikunni spilaði sinn fyrsta leik með liðinu strax í kvöld.
Landstede sótti þá heim lið Aris Leeuwarden í BNXT-deildinni, sameiginlegri úrvalsdeild Hollands og Belgíu, og vann stórsigur, 94:73. Þórir lék í 15 mínútur með Landstede, skoraði 4 stig og átti tvær stoðsendingar.
Lið hans fór þar með upp í fimmta sætið af ellefu liðum í Hollandshluta deildarinnar en liðin spila fyrri hluta tímabils hvort í sínu landi. Fimm efstu liðin hvoru megin fara síðan í Gulldeild BNXT en hin liðin í Silfurdeild BNXT.
Snorri Vignisson, fyrrverandi leikmaður Breiðabliks, leikur með Hague Royals í sömu deild. Lið hans tapaði 103:69 fyrir Feyenoord í kvöld en Snorri var í stóru hlutverki. Hann var næststigahæstur hjá Hague með 14 stig, tók auk þess 6 fráköst og átti 2 stoðsendingar á 29 mínútum. Hague er neðst í Hollandshlutanum með aðeins einn sigur í fyrstu tólf leikjunum.