Golden State Warriors vann Dallas Mavericks 126:117 í úrslitum Vesturdeildar NBA-körfuboltans í Bandaríkjunum eftir endurkomu í nótt. Golden State er því komið í 2:0 í einvíginu eftir tvo heimasigra.
Staðan var 72:58 fyrir Dallas Mavricks í fyrri hálfleik en Golden State náði svo góðum 25:13 og 43:32 kafla í þriðja og fjórða leikhluta og sigldi sigrinum heim.
Stephen Curry skoraði 32 stig, var með 8 fráköst og 5 stoðsendingar. Jordan Poole skoraði 21 stig og átti 5 stoðsendingar. Luka Dončić var með 42 stig, 5 fráköst og 8 stoðsendingar, stórleikur hjá Slóvenanum þrátt fyrir tap.
Fjóra sigra þarf til að fara í lokaúrslitaeinvígið og mætir sigurliðið annað hvort Miami Heat eða Boston Celtics í lokaúrslitum.