Slóveninn Luka Doncic átti enn einn stórleikinn fyrir Dallas Mavericks þegar liðið vann góðan 119:109-sigur á Golden State Warriors í fjórða leik liðanna í úrslitaeinvígi vesturdeildar NBA-deildarinnar í körfuknattleik í nótt.
Golden State hefði með sigri sópað Dallas í sumarfrí en Dallas minnkaði þess í stað muninn í 3:1 í einvíginu.
Doncic skoraði 30 stig, tók 14 fráköst og gaf níu stoðsendingar fyrir Dallas í nótt.
Liðsfélagi hans Dorian Finney-Smith var næststigahæstur í leiknum með 23 stig.
Steph Curry var stigahæstur í liði Golden State með 20 stig auk þess sem hann gaf fimm stoðsendingar.
Liðin mætast í fimmta leik sínum aðfaranótt föstudags.