HM er ekki lengur bara fjarlægur draumur

Þeir eru ótrúlegir, íslensku landsliðsmennirnir í körfubolta. Hvernig þeim tókst að herja út sigur á Hollendingum á Ásvöllum í gærkvöld, 67:66, eftir að hafa verið undir meirihluta leiksins er nánast óskiljanlegt. Eiginlega ólýsanlegt.

Sigur sem er svo gríðarlega dýrmætur fyrir framhaldið. Sigur sem getur fleytt liðinu svo langt. Sigur sem kemur liðinu í kjörstöðu og það verður tilhlökkunarefni að sjá það glíma við Spán, Úkraínu og Georgíu í hörðum slag um sæti í lokakeppni HM. Sem eftir þennan magnaða sigur er orðið meira en bara langsóttur draumur.

Strákarnir eru komnir í frábæra stöðu og fram undan eru spennandi mánuðir fyrir íslenskan körfubolta. HM 2023 í austurhluta Asíu, þangað gæti Ísland komist. Þrátt fyrir að þurfa að hefja leik á fyrsta stigi forkeppninnar. Og án annars af tveimur fremstu körfuboltamönnum landsins, Martins Hermannssonar.

Annar leikhlutinn virtist ætla að verða banabiti íslenska liðsins. Leikmönnum var gjörsamlega fyrirmunað að hitta í körfuna og Ísland skoraði fimm, segi og skrifa fimm stig í leikhlutanum. Eftir fyrri hálfleikinn var þriggja stiga nýting íslenska liðsins 6,3 prósent, eitt skot af sextán rataði rétta leið!

Greinin í heild sinni er í Morgunblaðinu í dag