Körfuknattleiksdeild Breiðabliks hefur samið við angólska landsliðsmanninn Julio de Assis um að leika með karlaliðinu á komandi tímabili.
Karfan.is greinir frá og kveðst hafa heimildir fyrir.
De Assis lék með Vestra í efstu deild, Subway-deildinni, fyrri hluta síðasta tímabils þar sem hann var með 17 stig, níu fráköst og þrjár stoðsendingar að meðaltali í leikjunum 11 sem hann lék fyrir liðið.
Hann er 201 sentimetri á hæð og leikur í stöðu framherja.
Breiðablik leikur í efstu deild á næsta tímabili eftir að hafa haldið sér sannfærandi uppi sem nýliðar á því síðasta.