Gamla ljósmyndin: Formaðurinn
Setja bókamerki
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Guðbjörg Norðfjörð tók fyrirvaralítið við formennsku hjá Körfuknattleikssambandi Íslands í lok mars en hafði gegnt embætti varaformanns um árabil.
Guðbjörg er aðeins önnur konan sem verður formaður Körfuknattleikssambandsins en sú fyrsta var Þórdís Anna Kristjánsdóttir sem fór fyrir körfuknattleikshreyfingunni 1983-1984.
Konur eru í auknum mæli að taka að sér forystuhlutverk í íþróttahreyfingunni sem sést til að mynda á því að nú eru konur í formennsku bæði hjá KKÍ sem og Knattspyrnusambandinu. Undanfarna daga hafa auk þess borist af því fréttir að fyrstu konurnar hafi tekið við formennsku hjá fornfrægum félögum eins og KR og Fram.
Guðbjörg var á sínum tíma ein besta körfuknattleikskona landsins. Hún lék með Haukum og KR og var fyrirliði KR sem varð þrívegis Íslandsmeistari á fjórum árum 1999-2002.
Á myndinni fagnar Guðbjörg sætum sigri ásamt samherjum sínum í KR gegn Keflavík í Frostaskjólinu í febrúar árið 2000.
Fremri röð frá vinstri: Sigrún Skarphéðinsdóttir, Hanna Björg Kjartansdóttir, Gréta María Grétarsdóttir, Kristín Björk Jónsdóttir
Aftari röð frá vinstri: Guðbjörg, Hildur Sigurðardóttir og Emelie Ramberg.
Guðbjörg var valin besti leikmaður Íslandsmótsins árið 1997 og var í liði 20. aldarinnar sem valið var af KKÍ árið 2001.
Guðbjörg lék 53 A-landsleiki á árunum 1990 til 2002.
Íslandsmóti kvenna í körfuknattleik lauk á dögunum með sigri Vals og í vikunni sigraði Tindastóll í karlaflokki.
Tveir í bílnum sem lenti utan vegar
„Okkur miðar í rétta átt“
Verðbólgan komin niður í 6%
Veiting hvalveiðileyfis ekki brot á EES-samningi
Handtekin eftir að tvö börn fundust látin
Vélsleðaslys: Þyrlan kölluð út á mesta forgangi
„Á réttri leið en nokkuð í land ennþá“