Þetta er áhlaupsleikur og þeirra áhlaup höfðu þetta í dag

Grindvíkingar eru með bakið upp við vegginn fræga eftir sárt tap gegn Stjörnunni í Smáranum í kvöld. Var þetta annar leikur liðanna í undanúrslitum Íslandsmóts karla í körfubolta og er staðan 2:0 fyrir Stjörnunni. Grindvíkingar þurfa því að sigra í Garðabænum á mánudagskvöld en það hefur þeim ekki tekist síðan 2018.

Bragi Guðmundsson leikmaður Grindavíkur var að vonum svekktur með tapið í kvöld þegar mbl.is spurði hann út í hvað hefði valdið því að Grindvíkingar misstu leikinn frá sér í lokin:

„Þetta er svo nýbúið að ég veit eiginlega ekki hvað ég á að segja. Við bara settum alltaf árar í bát þegar við vorum búnir að ná forskoti og þetta gerist nokkrum sinnum í leiknum. En við vorum ekki nógu góðir varnarlega í kvöld og okkur vantaði líka upp á sóknarfráköstin.“ 

Þið náið 15 stiga forskoti í öðrum leikhluta og síðan náið þið ágætum forskotum í bæði þriðja og fjórða leikhluta. Voruð þið ekki með neinar lausnir á þeirra hröðu áhlaupum sem kostuðu ykkur alltaf forskotið í leiknum?

„Þetta er áhlaupaleikur og þeirra áhlaup höfðu þetta í dag en við áttum að vinna þennan leik og það er sárt að það gerðist ekki.“

Grindavík er núna einu tapi frá því að fara í sumarfrí. Megum við eiga von á sigri hjá Grindavík á mánudagskvöld?

„Ef menn halda að við séum að fara gefast upp þá eru þeir eitthvað að ruglast. Við mætum brjálaðir á mánudaginn og vinnum Stjörnuna,“ sagði Bragi í samtali við mbl.is.

• Blogga um frétt