Íþróttir | Körfubolti | mbl | 10.5.2025 | 23:00 | Uppfært 13.5.2025 10:38

Gamla ljósmyndin: 15 ár milli úrslitaleikja

mbl.is/Sverrir Vilhelmsson

Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.

Gamli refurinn frá Grundarfirði og fyrrverandi landsliðsfyrirliði, Hlynur Bæringsson, er aftur kominn í úrslit Íslandsmótsins í körfuknattleik en hann leikur með Stjörnunni sem er í úrslitum á móti Tindastóli.

Frétt af mbl.is

Gamla ljósmyndin: Rembingskoss

Hlynur lék síðast til úrslita á Íslandsmótinu árið 2010 þegar Snæfell varð Íslandsmeistari og raunar bikarmeistari einnig undir stjórn Inga Þórs Steinþórssonar sem nú er aðstoðarþjálfari Stjörnunnar.

Fimmtán ár voru því á milli úrslitaleikja hjá Hlyni sem er býsna magnað en Hlynur er fæddur árið 1982 og verður 43 ára í sumar. Ef flakkað er milli landa er örlítið styttra síðan Hlynur var í úrslitum í Svíþjóð með Sundsvall. Varð hann sænskur meistari árið 2011 með Sundsvall ásamt Jakobi Erni Sigurðarsyni.

Meira en tveir áratugir eru liðnir frá því Hlynur var fyrst í úrslitum en Snæfell tapaði vorið 2004 fyrir Keflavík í úrslitum Íslandsmótsins. Niðurstaðan varð sú sama 2005 og 2008 eða þar til Snæfell braut ísinn árið 2010.

Frétt af mbl.is

Gamla ljósmyndin: Leikstjórnandi „par excellence“

Meðfylgjandi mynd er þó ekki frá úrslitarimmu Snæfells og Keflavíkur árið 2010 heldur fórum við dýpra í myndasafnið og fundum mynd frá leik KR og Snæfells árið 2002 eða frá því Hlynur var tvítugur. Myndina tók Sverrir Vilhelmsson í KR-heimilinu en þar er Hlynur á milli tveggja leikmanna KR. Annars vegar Helga Rafns Guðmundssonar (8) sem er Hólmari og lék með Hlyni í Snæfelli. Hins vegar er það Skarphéðinn Freyr Ingason sem virðist vera að góma boltann en Mývetningurinn tók hraustlega á því í lyftingasalnum á þessum árum eins og sjá má. Sverrir Vilhelmsson myndaði fyrir Morgunblaðið og mbl.is í áratugi.

Hlynur hefur afrekað margt á löngum ferli og hér verður einungis stiklað á stóru. Hann var valinn besti leikmaður Íslandsmótsins 2008 og 2010. Var valinn besti varnarmaðurinn í Svíþjóð 2013 og 2014 en tók einnig flest fráköst allra í sænsku úrvalsdeildinni 2011, 2013 og 2016. Enginn hefur tekið fleiri fráköst í efstu deild Íslandsmótsins.

Hlynur var fyrirliði íslenska landsliðsins bæði á EM í Berlín 2015 og EM í Helsinki 2017. Hann er sjötti leikjahæsti leikmaður landsliðsins frá upphafi með 129 A-landsleiki.

Hér heima lék hann einnig með Skallagrími fyrir utan Snæfell og Stjörnuna. Erlendis lék hann einnig með Aris Leeuwarden í Hollandi fyrir utan Sundsvall.

Hlynur hafnaði í 7. sæti í kjöri Samtaka íþróttafréttamanna á íþróttamanni ársins árið 2010.

Úrslitarimma Tindastóls og Stjörnunnar hófst á fimmtudagskvöldið á Króknum með sigri Tindastóls, 93:90, og mætast liðin öðru sinni í Garðabænum annað kvöld.