Óttast það versta hjá stjörnunni

Jayson Tatum, stærsta stjarna NBA-meistara Boston Celtics, fór sárþjáður af velli þegar liðið tapaði fyrir New York Knicks í fjórða leik liðanna í undanúrslitum Austurdeildarinnar í nótt.

Óttast er að Tatum hafi slitið hásin á hægri fæti sem myndi ekki einungis þýða að þátttöku hans á yfirstandandi tímabili sé lokið heldur að stór hluti næsta tímabils er í hættu.

Fer Tatum í myndatöku í dag þar sem kemur í ljós hvort meiðslin séu jafn alvarleg og útlit er fyrir.

Í sjónvarpsútsendingu eftir leikinn var hann myndaður í hjólastól þar sem tárin streymdu niður kinnar Tatums, sem er ekki til þess fallið að sefa áhyggjur Boston-manna.