Þeir voru í handboltavörninni sinni

Ægir Þór Steinarsson leikmaður Stjörnunnar var svekktur er hann ræddi við mbl.is í kvöld enda nýbúinn að tapa fyrir Tindastóli, 110:97, í þriðja leik liðanna í úrslitum Íslandsmótsins í körfubolta. Tindastóll þarf nú aðeins einn sigur til viðbótar til að verða meistari.

Frétt af mbl.is

Tindastóll gekk frá Stjörnunni í lokin

„Við náðum ekki stoppum og skoruðum ekki, þannig var þetta síðustu fimm mínútur. Þetta var mjög lélegt,“ sagði Ægir. Stjarnan komst yfir í fyrsta skipti í leiknum í lok þriðja leikhluta og var yfir í byrjun fjórða. Eftir það tók Tindastóll völdin og voru lokamínúturnar óspennandi.

„Mér fannst við ekki vera að elta, heldur vorum við í þeim allan tímann. Við náðum forskoti og svo rann þetta einhvern veginn úr höndunum á okkur. Þeir voru í handboltavörninni sinni allan tímann og fengu það. Það var erfitt,“ sagði hann.

Stemningin í stúkunni í einvíginu hefur verið rosaleg og var engin breyting á í kvöld. „Svona hefur þetta verið frá undanúrslitunum. Þetta er gaman og skemmtilegt að taka þátt í svona umhverfi, þótt það sé auðvitað skemmtilegra að vinna.

Stjarnan fær tækifæri til að jafna einvígið í 2:2 með sigri í fjórða leik í Garðabæ á sunnudaginn.

„Við spilum vel á heimavelli og þeir þurfa að fara í gegnum Ásgarð til að vinna. Það er okkar heimavöllur og þar vinnum við leiki,“ sagði Ægir.

• Blogga um frétt