Gamla ljósmyndin: Í úrslitum NBA
Setja bókamerki
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Einhvern tíma hefði það þótt saga til næsta bæjar að fyrrverandi leikmaður á Íslandsmótinu í körfuknattleik væri þátttakandi í úrslitarimmunni í amerísku NBA-deildinni. Sú staða er þó uppi um þessar mundir.
Oklahoma City Thunder og Indiana Pacers eiga eftir að leika hreinan úrslitaleik aðfaranótt mánudagsins um sigurinn í NBA þar sem staðan er 3:3 í úrslitunum. Í þjálfarateymi Indiana Pacers er Jenny Boucek fyrrverandi leikmaður Keflavíkur.
Veturinn 1997 - 1998 var Boucek á Íslandi og varð tvöfaldur meistari með Keflavík. Boucek var hörkuleikmaður. Skoraði hún rúm 20 stig að meðaltali í leik og var valin besti erlendi leikmaðurinn á lokahófi KKÍ.
/frimg/1/40/30/1403051.jpg)
Meðfylgjandi mynd tók Sigurður Valgeirsson af Boucek á fjölum Laugardalshallarinnar eftir sigur Keflavíkur á ÍS í bikarúrslitaleiknum. Með Boucek á myndinni er ungur stuðningsmaður Keflavíkur, Ingimundur Guðjónsson. Birtist myndin á bls 2 í íþróttablaði Morgunblaðsins hinn 17. febrúar árið 1998.
„Íslendingar, og þá sérstaklega Keflvíkingar, hafa gert svo mikið fyrir mig og ég veit ekki hvernig get endurgoldið þeim en vona að ég hafi gert eitthvað þeim til ánægju í úrslitaleiknum. Þetta er einstakt land og þá er ég ekki bara að tala um körfuboltann heldur þessa miklu gleði hér,“ sagði Boucek meðal annars í samtali við Skúla Unnar Sveinsson í Morgunblaðinu en hún skoraði 27 stig í úrslitaleiknum.
Sakar Hildi Sverrisdóttur um valdarán
Kjarnorkuákvæðið ekki á dagskrá sem stendur
Virkjunin væri í uppnámi ef ekki væri fyrir ný lög
Skotin flugu á milli Guðrúnar og Kristrúnar
Yfir 160 manns enn saknað í Texas
Fánarnir verða dregnir upp að nýju
Um hvað snýst þetta Hvammsvirkjunarmál?
Segir lóðaskort valda fækkun íbúða í byggingu