MMA bardagakappinn Khabib Nurmagomedov ætlar sér ekki að snúa aftur í UFC en þetta staðfesti Charles Oliveira, félagi hans og bardagakappi innan UFC.
Nurmagomedov lagði hanskana á hilluna í lok nóvember eftir að hann varði heimsmeistaratitil sinn í léttivigt í Forum Arena í Abú Dabí.
Rússinn hefur þrívegis varið heimsmeistaratitil sinn í léttivigt en missti föður sinn skyndilega fyrr á árinu eftir að hann hafði greinst með kórónuveiruna.
„Þetta var minn síðasti bardagi á ferlinum,“ sagði Nurmagomedov eftir sigurinn gegn Bandaríkjamanninum Justin Gaethje.
„Hann er ekki að fara berjast aftur,“ sagði Oliveira í samtali við MMANews á dögunum.
„Hann sór við gröf föður síns að hann myndi ekki berjast aftur,“ bætti Oliveira við.
Nurmagomedov, sem er 32 ára gamall, er á meðal sigursælustu bardagakappa í sögu UFC en hann vann 29 bardaga á ferlinum og beið aldrei ósigur.