Conor McGregor segir sigur Dustins Poirier gegn sér í aðalbardaga UFC 264 í blönduðum bardagalistum í Las Vegas aðfaranótt sunnudags ekki hafa átt að telja.
Írinn fótbrotnaði áður en Poirier var dæmdur sigur á tæknilegu rothöggi undir lok fyrstu lotu.
„Dustin, þú getur fagnað þessum ólögmæta sigri eins og þú vilt en þú gerðir ekkert. Í annarri lotu hefði það komið glögglega í ljós,“ sagði McGregor í myndskeiði sem hann birti í nótt.
Fyrr í myndskeiðinu sagði hann aðgerðina sem hann gekkst undir í Las Vegas í gær hafa gengið eins vel og hægt hafi verið að vonast til.
„Allt gekk samkvæmt áætlun og mér líður frábærlega. Ég verð á hækjum í sex vikur og svo hefst endurhæfing,“ sagði McGregor jákvæður og hélt áfram:
„Þetta var svakaleg fyrsta lota og það hefði verið gott að fara í aðra lotu og sjá hvað myndi gerast en svona er þetta. Hreint brot á sköflungi og þessu var ekki ætlað að verða.
En við höldum áfram, byggjum okkur upp og komum til baka betri en nokkru sinni fyrr.“