Bandaríska skíðakonan Lindsey Vonn viðurkennir að sér hafi sárnað þegar hún var sökuð um að vera andstæðingur Bandaríkjanna. Vonn ætlar ekki að tjá sig opinberlega um málefni sem tengjast forseta landsins, Donald Trump, í náinni framtíð.
Vonn, ólympíumeistari í bruni 2010 og tvöfaldur heimsmeistari í alpagreinum, segist vera fulltrúi Bandaríkjamanna á Ólympíuleikunum en ekki fulltrúi Donalds Trumps. Lét hún þessi ummæli falla í viðtali við CNN nýverið og hefur hún orðið fyrir miklum árásum á Twitter vegna þessa. Spurð í framhaldinu hvort hún myndi þiggja boð í Hvíta húsið að leikunum loknum sagði hún svo ekki vera. „Ég vil vera góður fulltrúi fyrir Bandaríkin en ég er ekki viss um að margir í ríkisstjórninni séu það.“
Vonn hafnaði í 6. sæti í risasviginu á Ólympíuleikunum í gær en það var tékkneska snjóbrettakonan Ester Ledecka sem kom öllum á óvart og fór með sigur af hólmi í risasviginu.