Ólympíuleikar ungmenna, sem ætlaðir eru íþróttafólki á aldrinum 15 til 18 ára, fara fram í Buenos Aires í Argentínu dagana 6. til 18. október. Keppt verður í 32 íþróttagreinum sem eru bæði hefðbundnar og nýstárlegar og munu í fyrsta skipti á ólympískum viðburði vera jafnmargir karlkyns og kvenkyns keppendur.
Ísland sendir inn níu keppendur að þessu sinni sem hafa ýmist tryggt sér þátttökurétt á úrtökumörkum fyrir leikana, náð tilskildum lágmörkum eða hafa verið tilnefndir af sínum sérsamböndum í boðsæti. Eftirtaldir einstaklingar munu keppa fyrir Íslands hönd í Buenos Aires:
Sund
Brynjólfur Óli Karlsson 50 og 200 metra baksund
Karen Mist Arngeirsdóttir 100 metra bringusund
Snæfríður Sól Jórunnardóttir 50, 100 og 200 metra skriðsund
Golf
Hulda Clara Gestsdóttir einstaklings- og parakeppni
Ingvar Andri Magnússon einstaklings- og parakeppni
Frjálsíþróttir
Elísabet Rut Rúnarsdóttir sleggjukast
Guðbjörg Jóna Bjarnadóttir 200 metra hlaup
Valdimar Hjalti Erlendsson kringlukast
Fimleikar
Martin Bjarni Guðmundsson fjölþraut drengja
Ingibjörg Kristín Jónsdóttir mun taka þátt í leikunum fyrir hönd Íslands sem ungur áhrifavaldur (Young Changemaker) en um er að ræða verkefni á vegum Alþjóðaólympíunefndarinnar sem felur í sér að halda utan um fjölbreytta fræðslu og afþreyingu fyrir keppendur á leikunum. Ingibjörg Kristín keppti sjálf á Ólympíuleikum ungmenna í Singapore árið 2010 og hefur mikla reynslu af þátttöku í stórmótum í gegnum árin en hún hefur átt langan og farsælan feril sem afreksíþróttakona í sundi.