Sænska kvennalandsliðið í knattspyrnu gerði sér lítið fyrir og vann afar öruggan 3:0 sigur gegn heimsmeisturum Bandaríkjanna í fyrsta leik liðanna í G-riðlinum á Ólympíuleikunum í Tókýó í morgun.
Þær sænsku voru sterkari aðilinn allan tímann og komust yfir með laglegu skallamarki Stinu Blackstenius, sóknarkonu Häcken, sem Diljá Ýr Zomers leikur með, á 25. mínútu. Hún fékk þá fyrirgjöf frá Sofiu Jakobsson, sleit sig lausa og skoraði af öryggi.
Staðan 1:0 í hálfleik og Blackstenius var aftur á ferðinni snemma í síðari hálfleiknum, á 55. mínútu.
Hún skoraði þá af stuttu færi með vinstrifótarskoti í kjölfar hornspyrnu.
Góðu dagsverki var þar með lokið hjá Blackstenius og var hún tekin af velli á 63. mínútu.
Inn í hennar stað kom Lina Hurtig. Hún mátti ekki vera eftirbátur Blackstenius og gerði út um leikinn á 72. mínútu.
Hún fékk þá fyrirgjöf frá Hönnu Glas og skoraði með góðum skalla fyrir miðjum teignum.
Staðan orðið 3:0, sem reyndust lokatölur.
Ellen White var hetja Stóra-Bretlands þegar liðið vann 2:0 sigur á Síle í E-riðlinum.
Hún skoraði bæði mörk Stóra-Bretlands, það fyrra af stuttu færi á 18. mínútu eftir sendingu frá Lauren Hemp og það síðara með magnaðri bakfallsspyrnu eftir sendingu Lucy Bronze á 72. mínútu.
Brasilía átti svo ekki í nokkrum vandræðum með Kína í F-riðlinum.
Staðan var 2:0 í hálfleik og seint í leiknum komu þrjú mörk til viðbótar. Snillingurinn Marta skoraði tvö marka Brasilíukvenna og Beatriz, Debinha og Andressa Alves skoruðu eitt mark hver, sú síðastnefnda úr vítaspyrnu.