Brisbane gestgjafi Ólympíuleikanna 2032

Thomas Bach forseti Alþjóða ólympíunefndarinnar staðfestir valið á Brisbane 2032.
Thomas Bach forseti Alþjóða ólympíunefndarinnar staðfestir valið á Brisbane 2032. AFP

Áströlsku borginni Brisbane, höfuðborg Queensland-fylkis, var í dag úthlutað gestgjafahlutverkinu á Ólympíuleikunum og Ólympíumóti fatlaðra árið 2032.

Alþjóða ólympíunefndin tilkynnti þetta eftir fund sinn í Tókýó í dag en Brisbane hafði snemma á þessu ári verið sett efst á lista yfir líklegustu borgir til að hreppa hnossið.

Þetta verður í þriðja sinn sem Ólympíuleikarnir fara fram í Ástralíu en áður voru þeir haldnir í Melbourne árið 1956 þegar Vilhjálmur Einarsson fékk silfurverðlaun í þrístökki og komst fyrstur Íslendinga á verðlaunapall á Ólympíuleikum, og síðan í Sydney árið 2000 þegar Vala Flosadóttir fékk bronsverðlaunin í stangarstökki.

Brisbane hefur einu sinni áður sótt um að halda Ólympíuleikana. Borgin freistaði þess að fá að halda þá árið 1992 en þá varð Barcelona fyrir valinu.

mbl.is