Brasilía er komið í undanúrslitin í knattspyrnu karla á Ólympíuleikunum í Tókýó eftir að hafa sigrað Egyptaland í fjórðungsúrslitunum með minnsta mun í morgun.
Sigurmarkið kom á 37. mínútu, þegar Richarlison, framherji Everton, lagði boltann fyrir markið og fann þar Matheus Cunha, framherja Herthu Berlín, sem skoraði með góðu skoti niður í fjærhornið.
Brasilía mun mæta annaðhvort Suður-Kóreu eða Mexíkó í undanúrslitunum, en þau etja nú kappi og er Mexíkó með 3:1 forystu að loknum fyrri hálfleik.