Bandaríkjakonan vann óvæntan sigur

Katie Nageotte grætur af gleði eftir glæsilegan sigur í stangarstökki …
Katie Nageotte grætur af gleði eftir glæsilegan sigur í stangarstökki í dag. AFP

Katie Nageotte frá Bandaríkjunum er ólympíumeistari í stangarstökki kvenna eftir harða rimmu við hina sigurstranglegu Anzheliku Sidorova frá Rússlandi í úrslitum greinarinnar á Ólympíuleikunum í Tókýó í dag.

Sidorova stökk af miklu öryggi og náði að komast auðveldlega yfir rána í fyrstu fjórum hæðunum; 4,50, 4,70, 4,80, og 4,85 metrum.

Nageotte fór hins vegar erfiðlega af stað og klikkaði á fyrstu tveimur tilraunum sínum þegar ráin var aðeins í 4,50 metrum. Í þriðja stökki komst hún hins vegar loks yfir.

Hún klikkaði á fyrsta stökki í 4,70 metrum en komst yfir í annarri tilraun.

Nageotte var þá komin á skrið og komst auðveldlega yfir í fyrstu tilraun þegar ráin var komin í 4,80 metra og 4,85 metra.

Framundan var þá einvígi milli hennar og Sidorova þegar þær reyndu við 4,90 metra. Nageotte komst með glæsilegum hætti yfir í annarri tilraun sinni á meðan Sidorova náði því ekki í fyrstu tveimur tilraunum sínum.

Sú rússneska lét þá hækka rána í 4,95 metra, sleppti þriðju tilraun sinni í 4,90 og hugðist þannig taka aftur stjórnina í einvíginu.

Hún var þó víðs fjarri því og þurfti að játa sig sigraða.

Nageotte er tók því gullið með því að stökkva yfir 4,90 metra og Sidorova tók silfrið eftir að hafa náð hæst að stökkva 4,85 metra.

Því náði hin breska Holly Bradshaw líka en þurfti fleiri tilraunir í heildina en Sidorova. Bronsið var því Bradshaw.

mbl.is