Íþróttaleikarnir WOW Reykjavik International Games hófust 25. janúar og lauk í gærkvöldi. Þetta var í 11. sinn sem leikarnir fóru fram en að þessu sinni var keppt í 17 einstaklingsíþróttagreinum. Flest af besta íþróttafólki okkar Íslendinga tók þátt og voru erlendir gestir um 600 talsins frá 48 löndum.
Um helgina var keppt í níu íþróttagreinum og lauk leikunum með mikilli hátíð í Laugardalshöllinni í gærkvöldi. Að hátíðarkvöldverði loknum ávarpaði forseti Íslands, Guðni Th. Jóhannesson, gesti og síðan var boðið upp á júdósýningu, dans og glæsilegt hátíðaratriði. Hátíðaratriðið var blanda af dansi, fimleikum, skylmingum og skotfimi en lag Bjarkar Guðmundsdóttir, Isobel, hljómaði undir. Það var Díana Rut Kristinsdóttir dansari sem túlkaði Isobel en leikstjóri var Jón Gunnar Þórðarson.
Eftirfarandi íþróttamenn voru stigahæstir eða valdir bestir í sinni íþróttagrein um helgina og fengu verðlaun á hátíðinni í gærkvöldi:
Badminton
Karl: Bartal Poulsen, Færeyjar
Kona: Þórunn Eylands, Ísland
Bogfimi
Karl: Carl Johan Bengtsson, Svíþjóð
Kona: Helga Kolbrún Magnúsdóttir, Ísland
Fimleikar
Karl: Nikolai Kisjkilev, Rússland
Kona: Uliana Perebinosova, Rússland
Frjálsíþróttir
Karl: Odain Rose, Svíþjóð
Kona: Emily Cherotich, Kenýa
Keila
Karl: Jesper Agerbo, Danmörk
Kona: Ástrós Pétursdóttir, Ísland
Skotfimi
Karl: Guðmundur Helgi Christensen, Ísland
Kona: Jórunn Harðardóttir, Ísland
Skvass
Karl: Þorbjörn Jónsson, Ísland
Skylmingar
Karl: Andri Nikolaysson Mateev, Ísland
Kona: Freyja Sif Stefnisdóttir, Ísland