Þeir voru vel upplýstir, skrautlegir og litríkir þátttakendurnir í Norðurljósahlaupi WOW á laugardagskvöldið.
Hlaupið hófst við Hörpu og þaðan ýmist hlupu eða gengu um 1.000 manns upp í Hallgrímskirkju skreyttir ljósum. Í kirkjunni fengu þátttakendur að hlýða á raftónverk eftir Svein Inga Reynisson sem var sérstaklega samið fyrir hlaupið.
Einnig var hlaupið hjá upplýstum Hljómskálanum og í gegnum Ráðhús Reykjavíkur. Endamark hlaupsins var í Listasafni Reykjavíkur þar sem dansarar og tónlistarmaðurinn Friðrik Dór héldu uppi stuðinu.
Norðurljósahlaup WOW var hluti af Vetrarhátíð og WOW Reykjavik International Games sem lauk í gær.