„Ég átti ekki að vera að keppa á þessu móti heldur Eygló [Fanney Sturludóttir] en hún er meidd og þurfti að draga sig úr keppni, ég fékk að vita í síðustu viku að ég ætti að keppa,“ segir Úlfhildur Arna Unnarsdóttir í samtali við mbl.is eftir keppni í ólympískum lyftingum á Reykjavíkurleikunum í dag þar sem íslenska liðið hafnaði í öðru sæti á eftir liði Noregs sem bar sigurorð úr býtum en eingöngu var um liðakeppni að ræða.
Úlfhildur gerði sér þó lítið fyrir og varð efst þeirra tíu kvenna sem kepptu í dag fyrir hönd fimm Norðurlandaþjóða en Svíar sendu ekki lið. Hlaut Úlfhildur, yngst kvenkyns keppenda, 237,173 Sinclair-stig en næst á eftir henni varð hin norska Julia Jordanger með 233,223 stig og þriðja Maibrit Reynheim Petersen frá Færeyjum með 223,063.
Sjaldan er ein báran stök því Þuríður Erla Helgadóttir, sem einnig var í liði Íslands og hefur getið sér gott orð í crossfit auk ólympískra lyftinga, boðaði forföll með minnsta mögulega fyrirvara. „Ég fékk bara SMS frá henni klukkan hálfsjö í morgun og fór náttúrulega bara í panikk, búin að missa liðsfélaga minn og þá vorum við bara þrjú, það hefði ekki gengið,“ segir Úlfhildur frá.
Liðið fullskipaðist þó á ný á allra síðustu stundu þegar Birta Líf Þórarinsdóttir hljóp undir bagga og tók sæti Þuríðar í íslenska liðinu. Þrátt fyrir skamman fyrirvara smeygði Birta sér í sjötta sætið af kvenkeppendunum tíu með 213,061 stig. Af tíu karlkyns keppendum varð Brynjar Logi Halldórsson í þriðja sæti með 350,131 stig og Alex Daði Reynisson í sjötta sæti með 319,795 stig.
Engin verðlaun voru veitt einstaklingum þar sem um liðakeppni var að ræða og urðu úrslit þessi:
„Svo hefst keppnin. Mér leið ótrúlega vel og upphitunin gekk vel en þar sem ég var að keppa í liði gat ég ekki tekið alveg eins mikla sénsa og þegar ég er að keppa ein,“ segir Úlfhildur af mótinu. Hafi hún því ákveðið að byrja af öryggi í fyrri grein ólympískra lyftinga, snörun, og lyfti þar 75 kg.
„Ég fer svo bak við, það var töluverð bið á milli lyfta þar sem við vorum allar frekar jafnar og í svipuðum þyngdum. Þar lyfti ég 78 létt og fer þá í 80 í næstu lyftu á pallinum en missi stöngina aftur fyrir mig, hún var bara of létt. Þannig að ég ákvað að hoppa upp í 82 kg til að ná fyrsta sætinu í snörun og það gekk,“ segir Úlfhildur sem á 87 kg í snörun en var þá einum þyngdarflokki ofar svo 82 kg eru tveggja kg bæting í núverandi flokki hennar.
Úlfhildur opnaði í 98 kg í jafnhendingu, hinni keppnisgreininni, fór þaðan í 101 og að lokum í 103 kg sem allt fór upp í dag.
„Birtu gekk vel miðað við aðstæður, hún stóð sig rosalega vel miðað við fyrirvarann sem hún fékk, tók 81 kg í snörun og 98 í clean and jerk [jafnhendingu] sem er mjög flott hjá henni. Hún var á erfiðri crossfit-æfingu í gær og alveg búin á því svo þetta var geggjað flott hjá henni,“ segir Úlfhildur um stöllu sína eftir harða keppni við Norðmenn á Reykjavíkurleikunum í dag.