Sé fram á að geta komist í úrslit EM

Kolbeinn Höður Gunnarsson, spretthlaupari úr FH, kveðst aldrei hafa verið í betra formi en um þessar mundir. Hann stórbætti eigið Íslandsmet í 200 metra hlaupi innanhús á frjálsíþróttamóti Reykjavíkurleikanna í dag.

Frétt af mbl.is

Kolbeinn stórbætti eigið Íslandsmet

„Tilfinningin er frábær, það er alltaf gott að finna að maður er að taka skref fram á við. Upplifunin er þannig að það er meira inni.

Maður hugsar alltaf lengra fram í tímann þannig að á næsta ári verður maður vonandi kominn við hlið þeirra hröðustu.

Þetta er allt á jákvæðri uppleið. Ég er bara mjög sáttur,“ sagði Kolbeinn í samtali við mbl.is eftir að hann kom í mark á 21,03 sekúndum í dag.

Viss um að slá eigið met í 60 metrunum

Hann tók einnig þátt í 60 metra hlaupi karla, kom þar einnig fyrstur í mark og hjó ansi nærri eigin Íslandsmeti, sem hann setti á Nike-mótaröðinni í Kaplakrika í síðasta mánuði.

Met hans í greininni er 6,68 sekúndur en í dag kom hann í mark á 6,72 sekúndum.

„Ég er búinn að vera röngu megin við 6,70 í nokkur skipti núna en ég er alltaf að hitta á sömu tímana þannig að ég veit að þetta er þarna inni. Þetta er því bara tímaspursmál. Ekki hvort heldur hvenær maður hittir á rétta hlaupið og allt gangi upp.

Við erum eiginlega bara að bíða eftir því. Því fleiri hlaup og því betri keppnir sem ég kemst í þá er ég 110 prósent viss um að það gangi eftir,“ sagði Kolbeinn um 60 metra hlaupið.

Frétt af mbl.is

Kolbeinn hjó nærri Íslandsmetinu

„Ég vil ekki fara of langt fram úr mér en ég sé fram á að geta komist í úrslit á Evrópumeistaramótinu. Ég ætla allavega ekki að segja að það sé ekki hægt,“ bætti hann við.

Skilar sér vonandi í ólympíulágmarki

Er Kolbeinn var spurður að því hvort líkamlega formið sem hann væri nú í væri það besta á ferlinum stóð ekki á svörum.

„Algjörlega. Þetta er svona í fyrsta sinn sem ég fer „all-in“ í þessari íþrótt, ef svo má segja. Ég finn bara, afsakið orðbragðið, helvíti mikinn mun á því að geta einbeitt mér alfarið að þessu.

Núna er bara að halda þessum dampi áfram og vonandi skilar það sér í ennþá betri bætingum fram á næsta ár og ólympíulágmarki,“ sagði Kolbeinn að lokum í samtali við mbl.is.

• Blogga um frétt