Hjaltadalsá og Kolka í útboð

Veiðifélagið Kolka, sem annast veiðirétt í Hjaltadalsá og Kolbeinsdalsá í Skagafirði, hefur ákveðið að óska eftir tilboðum í lax- og silungsveiði árinnar frá og með næsta sumri til ársins 2020.

Báðar árnar koma að hluta til frá jöklum en eru þó sjaldan það litaðar að það hamli veiðum að ráði. Oft eru góðar sjóbleikjugöngur í árnar og hefur meðalveiðin síðustu árin verið á milli 300 til 500 bleikjur yfir sumarið og nokkrir tugir laxa. Þá veiðist ávallt eitthvað af sjóbirtingi til viðbótar.

Veiðistaðir dreifast um vatnakerfið, langt inn eftir Hjaltadal og upp að stíflu í Kolbeinsdalsánni, sem gerð var árið 1985 í kjölfarið á virkjun við Sleitustaði og takmarkar frekari fiskgengd upp ána. Báðar árnar eru straumharðar með köflum og voru miklir farartálmar áður en þær voru brúaðar. Sameinast þær svo nokkrum kílómetrum frá sjó og renna í hinn sögufræga Kolkuós sem eitt sinn var verslunarstaður og á því svæði eru fimm merktir veiðistaðir.

Umsjónarmaður útboðsins er Guðríður Magnúsdóttir á Víðivík (vidvik@mi.is) og er frestur til að skila inn tilboðum til 15. febrúar. Verða þau svo opnuð í veiðihúsi félagsins að Efra-Ási þriðjudaginn 20. febrúar 2018 klukkan 13:00 í viðurvist þeirra bjóðenda sem þess óska.

• Blogga um frétt

Seinustu hundraðkallar sumarsins