Stofnandi IKEA orðinn ríkasti maður heims

Ingvar Kamprad, stofnandi sænsku húsgagnaverslunarkeðjunnar IKEA, hefur fellt Bill Gates, stjórnarformann Microsoft, úr sessi sem ríkasti maður heims. Sænska sjónvarpsstöðin SVT2 sagði í gærkvöldi að þetta kæmi fram í næsta tölublaði sænska viðskiptatímaritsins Veckans Affarer sem kemur út í vikunni en blaðið áætlar að Kamprad, sem er 77 ára, eigi nú um 400 milljarða sænskra króna eða um 4 þúsund milljarða íslenskra króna. Eignir Gates eru metnar á 47 milljarða dala eða um 3300 milljarða króna.

Kamprad, sem þekktur er fyrir að berast lítið á og ferðast m.a. alltaf í almenningsfarrými flugvéla og ekur á gömlum Volvo, býr í Sviss og tekur ekki lengur þátt í rekstri IKEA. Hann er samt aðaleigandi félagsins sem rekur um 180 verslanir í yfir 30 löndum.

SVT2 segir að fall Bandaríkjadals gagnvart öðrum gjaldmiðlum sé helsta ástæða þess að Kamprad hefur nú náð Gates.

• Blogga um frétt