FL Group hefur aukið við hlut sinn í AMR Corporation, móðurfélagi American Airlines, stærsta flugfélags í heimi, og á í dag 8,63% hlut í félaginu. FL Group er því stærsti hluthafi félagsins samkvæmt því sem tilkynnt hefur verið.
FL Group tilkynnti þann 26. desember að félagið hefði keypt 5,98% hlut í AMR Corporation. Frá því hefur FL Group haldið áfram að byggja upp stöðu í félaginu, að því er segir í tilkynningu til Kauphallar Íslands.
Til viðbótar við hlut félagins í AMR Corporation á FL Group einnig 22,4% hlut í Finnair.
Hannes Smárason, forstjóri FL Group, segir í tilkynningu til Kauphallar Íslands: „Á aðalfundi félagsins í dag upplýsti ég hluthafa okkar um aukningu á hlut félagsins í AMR Corporation. Við berum áfram miklar væntingar til þessarar fjárfestingar. Við höfum fylgst mjög grannt með rekstri flugfélaga í Bandaríkjunum og teljum horfur AMR Corporation fyrir árið 2007 séu afar góðar.”