Áhyggjur af greiðslugetu Rússlands

Skuldatryggingaálag rússneska ríkisins hefur hækkað mikið undanfarnar vikur vegna fjármálakreppunnar og þeirra áhrifa sem hún er að hafa á rússneska hagkerfið. Álagið er komið upp í 10,4% punkta og yfir íslenska ríkið sem stendur nú í um 9,45%.

Í Morgunkorni greiningardeildar Glitnis segir að álagið á íslenska ríkið hafi þannig frekar verið að lækka undanfarið á meðan álagið á rússneska ríkið hafi hækkað. Líklegt sé að lækkun álagsins á ríkissjóð Íslands tengist viðræðum við Alþjóðagjaldeyrissjóðinn.

„Hröð hækkun skuldatryggingaálags rússneska ríkisins endurspeglar vaxandi áhyggjur fjárfesta á að Rússar lendi í greiðslufalli. Skammt er að minnast þess þegar Rússar lentu í greiðslufalli 1998, sem olli verulegum hræringum á alþjóðamörkuðum og var m.a. lykilþáttur í falli vogunarsjóðsins fræga Long Term Capital Management.

Í gær breytti lánshæfismatsfyrirtækið S&P horfum um lánshæfiseinkunn rússneska ríkisins úr stöðugum í neikvæðar vegna áhyggja af áhrifum hinnar alþjóðlegu fjármálakreppu þar í landi og kostnaðar rússneska ríkisins vegna björgunar rússneskra banka og kostnaði þess við að verja rússnesku rúbluna. Spurning er hvort þetta hafi einhver áhrif á vilja rússneskra stjórnvalda til að lána íslenska ríkinu fé,“ segir í Morgunkorni Glitnis.

• 2 blogg um fréttina

Bloggað um fréttina

• Marinó G. Njálsson: Tími til kominn að banna skuldatryggingarálag og matsfyrirtæki
• Hallgrímur Guðmundsson: Þar fauk Rússalánið