Viðskipti | mbl | 28.10.2008 | 10:56 | Uppfært 11:15

Alþjóðleg viðskipti með krónu á ný

Viðskipti voru á alþjóðlegum gjaldeyrismarkaði með íslensku krónuna að nýju í morgun eftir að Seðlabankinn tilkynnti um 6 prósenta vaxtahækkun. Að sögn Reutersfréttastofunnar var gengið 240 krónur fyrir evru en opinbert gengi Seðlabankans er 152 krónur.

„Ég held að mönnum hafi létt við að nú er orðið ljóst hvaða stefna hefur verið mörkuð. Við vitum þó ekki enn hvernig skipt verður úr gjaldeyrisuppboðum í fljótandi gengi," segir Beat Siegenthaler, sérfræðingur hjá TD Securities í Lundúnum, við Reutersfréttastofuna.

Fram kemur að engin alþjóðleg viðskipti hafi verið með krónuna í viku og viðskiptin í dag hafi verið mjög lítil og sveiflukennd.