Viðskipti | mbl | 12.1.2010 | 11:12

Nauðsynlegt að hækka skatta

Steingrímur J. Sigfússon, fjármálaráðherra. Heiðar Kristjánsson

Fjármálaráðherra, Steingrímur J. Sigfússon, hélt uppi málsvörn fyrir ákvarðanir ríkisstjórnarinnar í skattamálum á Skattadegi Deloitte í dag. Sagði hann að nauðsynlegt hefði verið að hækka skatta eftir hrun þar sem skattstofnar stæðu ekki lengur undir tekjuþörf ríkisins.

Sagði Steingrímur að frekari breytinga á skattkerfinu væri að vænta og sagði fólk aðeins hafa rétt séð byrjunina, eða „you ain't seen nothing yet,“ eins og hann orðaði það. Lagði hann á það áherslu að við þá vinnu yrði samráð haft við aðila vinnumarkaðarins.

Vísaði hann einnig til orða Oliver Holmes, sem sagði skatta það gjald sem þegnar borga fyrir siðað samfélag.