Tap ferðaþjónustufyrirtækisins TUI Travel jókst á öðrum ársfjórðungi og má það einkum rekja til slæms efnahagsástands í Bretlandi og áhrifa eldgossins í Eyjafjallajökli á flugsamgöngur í apríl og maí. Vara stjórnendur fyrirtækisins við því að afkoman í ár verði undir væntingum.

Tap TUI Travel nam 409 milljónum punda, 77 milljörðum króna, á fyrstu níu mánuðum rekstrarársins, október-júní). Á sama tímabili á fyrra rekstrarári nam tapið 304 milljónum punda. Tekjur drógust saman um 8% og námu 8,224 milljörðum punda.

Í tilkynningu TUI Travel kemur fram að eldgosið í Eyjafjallajökli kostaði félagið 105 milljónir punda, 20 milljarða króna, sem er mun meira heldur en áætlað var. En fyrri áætlun hljóðaði upp á 90 milljónir punda. Fyrir eldgos var bókunarstaðan mjög góð en um leið og eldgosið hófst þá dró verulega úr bókunum, segir í tilkynningu TUI. 

Sala TUI hefur ekki verið samkvæmt áætlunum í Bretlandi og er það rakið til eldgossins í Eyjafjallajökli, sólríks sumars í Bretlandi og slæms efnahagsástands þar í landi sem hefur haft þau áhrif að Bretar ferðast mun meira innanlands en áður.